Ua toe faamanuiaina le 15 alo ma fanau sa o latou maua lenei avanoa i le Kuata muamua faaleaoaoga e fesoasoani ai le Rotary Club i ni avanoa sikolasipi e $15,000 mo le Kuata lona lua.
O le toe filifilia ai o i latou nei e 15 ona o le tulaga maualuga o faaiuga o suega i mataupu o loo aotauina ai.
O le sauniga o lenei faamoemoe sa faia lea i le faleaiga a le ROKO’s i Motootua ma na aua ai le Sui Ao o le Iunivesite Peseta Dr. Desmond Lee Hang o le Peresitene o le kalapu Titilia Bese-Tuilrva o i latou ua faamanuiaina faatasi ai ma mātua ma sui o le kalapu.
I se pepa o faamatalaga na faafetaia ai e Peseta lenei foai o le a fai lea ma fesoasoani i nai fanau aoga ma faamanatu ai ia i latou ua lautogia i nei avanoa ia faaaogā tatau avanoa ua maua.
Na faailoa foi e le Peresitene a le kalapu na amata mai i le 2011 ona fesoasoani le Rotary i avanoa sikolasipi nei e fesoasoani ai i fanau aoga a le Iunivesite.
O le auga o lenei fesoasoani ina ia lagolago lea i pili aoga aemaise lava i fanau o loo tausaga faavae i le Iunivesite ma i latou o loo i le polokalame o matata eseese.
