O lenei fesoasoani o loo tauala mai i le Malo o Iapani e ala lea i ana fesoasoani o loo faasafua i le tele o atina’e a le atunuu ma ua mafai ona ave ai le fesoasoani i le asosi lenei o loo gafa ma le toe faaaogāina o lapisi poo le recycle.
O loo ta’ua i se pepa o faamatalaga o lenei fesoasoani e aofia ai ni loli ma nisi o mea faigaluega mo le aufaigaluega ma o nei loli sa faaaogāina muamua e nisi o faalapotopotoga a Iapani i Samoa nei ma ua mae’a ona toe faaleleia vaega uma auā le auaunaga a le asosi ua tuuina iai.
O lenei fesoasoani e silia lea ma le $300,000 ma sa molimauina lenei faamoemoe e le Minisita o le Siosiomaga, Toeolesulusulu Cedric Schuster ma le Amepasa o le Malo o Iapani i Samoa nei, SENTA Keisuke faapea paaga ma nisi o sui o le Malo.
O lenei fesoasoani o se tasi lenei o vaega o loo lagolagoina e le Malo o Iapani e fesoasoani lea e faalauiloa le faamamāina o le siosiomaga ma le faalauiloaina o le mafai ai ona faaaogā lapisi e toe faaaogā e gaosi ai nisi o meatotino.
