E toa 300 le aofai o alii ma tamaitai faiaoga o le a galulue i le vaitau o le fonotaga a taitai o malo o le taupulega lea o le a talimalo ai Samoa ia Oketopa o le tausaga nei.
Na faaalia manino e le Ofisa Sili o Aoga ma Aganuu ua mae’a tuu atu le lisi o faiaoga o le a galulue i lea taimi i le Matagaluega o Leoleo, Falepuipui ma le Toefuataiga e pei ona iai le latou iloiloga o loo faagasolo nei.
Mo le silafia o le Matagaluega o Aoga na muai tuu atu iai le talosaga a le Matagaluega o Leoleo ona ua masani i taligamalo faapea, e pei ona iai le fonotaga a atumotu o le Pasefika lea sa talimalo ai foi Samoa i nai tausaga ua mavae.
E pei ona folasia i le Kalena o Aoga 2024, o le tausaga lenei e vave ai ona faatino suega mo le fanau a o lei oo i le tuuaga o le Kuata Tolu.
O le agaga atoa o lea fuafuaga, ina ia lava tapena uma Faiaoga, aemaise lava Faiaoga o Aoga Tulagalua i le faatinoga o a latou fuafuaga faaleaoaoga ina ia aua ne’i alia’e ni faaletonu poo ni faafitauli i le amatalia ai o aoaoga mo lenei tausaga fou.
Ua tāpā foi e le Matagaluega o Leoleo le fesoasoani mai isi atunuu e faamatuu mai nisi o a latou leoleo e fesoasoani i le puipuiga ma le saogalemu o malo faaaloalogia e malaga mai mo lea faamoemoe.
O lea fonotaga o le a auai mai ai ma le afioga i le Tupu ma lana Masiofo.
