Ua faaleo e le susuga Tavaoga Iakopo o se tasi o matai o le nuu o A’ele sona faanoanoaga ma tuuaia le pulega o le Ekalesia Metotisi i Samoa, ile maea faamautu o le faaiuga a le ekalesia ua vaevae ai eleele o loo latou nofoia, ma saini lona tuafafine e avea ma ona sui e faamautu ai le lisi o le fanua, ae e leo lona tuafafine o loo lesitala le suafa ile vaega eleele o loo nonofo ai i totonu o A’ele.

Na faia lea gaioiga e pei ona faailoa e Tavaoga ae o loo tapunia tuaoi o Samoa i faiga malaga ona o puipuiga o le faamai koviti, ole taimi lea o loo i Ausetalia.

Sa talosaga mai ile ekalesia mo se avanoa e faatali ai lea fuafuaga sei faaolatia mai i fanua peitai sa faatino lava le sainia o le lisi. O le tasi o faanoanoaga o lea tamalii ose vaega o eleele sa latou galueaina o loo iai a latou meatoto o laau tau faatoaga o loo faaaoga, ua avea ma fanua tanu e teu uma ai tagata maliliu o le nuu o A’ele.

Ua faatonuina ai aiga uma o le nuu e liutofaga ile fanua maliu o latou tagata ua teu i luma maota ma laoa.

O se vaega o le faatalanoaga ma le susuga Tavaoga Iakopo ose tasi o matai ma aigalotu o le ekalesia Metotisi i A’ele. E lei manuia taumafaiga mo se finagalo o le pulega o le ekalesia, ae o le masina o Oketopa o le tausaga e 2020 na toe iloilo ai e le ekalesia le feagaiga na osia ile tausaga e 1968 ma aiga o A’ele ma taunuu ai le ekalesia ise faaiuga na logoina uma ai aiga o le nuu e ala ise tusi.

O loo faaalia ai o le aiaiga na faia ile taimi o Pelesetene i lea taimi na nofoia ai le nuu ile masina o Aukuso o le tausaga e 1968, e tapu se tagata Samoa ona nofo i le nuu seia vagana ua mau paolo ise alii poo se tamaitai o tagata Solomona lona tupuaga.

E moomia foi le galulue o tagata i atinae tau faatoaga a le ekalesia, ma e nofo lisi foi i latou.  O loo talitonu Tavaoga Iakopo e leai se feagaiga na tusia ile amataga mai o le latou mafutaga ma le ekalesia ae o upu tuu fofoga sa tauave mai ile tele o tausaga i taimi oo latou matua, e faasino i le aiaiga o lo latou nofoia o A’ele.

Sa fia feiloai le aiga ile Pelesetene mo se avanoa e faatalanoa ai le latou mataupu peitai o le tala a Tavaoga na faasino i latou e talanoa ma le Pule o lisi o fanua o le ekalesia.