I le saunoaga faataupou a le sui faipule mo le itumalo o Palauli No.3 le susuga Lagaaia Ti’atuau Tufuga na muai ave lana tuualalo ia Samoa ina ia tuu atu le faatuatuaga i taitai ua tofia e atinae le atunuu mo le isi 5 tausaga o i luma.
E pei ona silafia o vaega i saunoaga faataupou a faipule e faailoa ai o latou manatu faaalia i le Tala faatatau autu o le tupe ua folasia i luma o le laulauafono.
Na ave le faamalo a Lagaaia i le Minisita o Tupe Mulipola Anarosa Ale Molioo mo le faamalamalamaga o le tala o le tupe ma o lona manatu faaalia pe e aofia ai ma le motu tele o Salafai i le tele o nei fesoasoani e tuuina atu mo pisinisi ma tulaga o mataaga mo tagata tafafao maimoa mai fafo.
“O lea ou te tilotilo i le 10 miliona mo pisinisi laiti, ou te fia fesili poo ai e agavaa ai mea ia, ae pe faafefea foi tufa ma faasoasoa”.
O le auga o le fesiligia e Lagaaia o ia vaega ona e le’i manino tulaga o le faasoasoaina ma le faatinoga o lea 10 miliona mai le tala o le tupe.
Taua e Lagaaia “E seāseā o’u faalogo i mea ia e aafia ai Savaii, pe na’o i nei lava (Upolu) ae makamaka Savaii, o lea la sei alofa tautuanā au tilotilo i taumafaiga a Savaii”.
O le isi vaega o le finagalo o le sui faipule o Palauli No.3 o le 5 miliona faaagaga mo fale apitaga a Turisi.
“O la’u fesili pe aofia ai ma beach fales ae pe faafefea foi ona faasoa lea vaega tupe, o lo’u itumalo e tasi a le mea e faamoemoe ai le taaloga foi lea o le faaseega i Aganoa pe oo iai le faasoa lea”.
E le gata na fesiligia e Lagaaia lea tulaga o le faasoasoaina o le tala o le tupe ae na ia talosaga foi i le Minisita o Galuega ina ia tautuanā auala i lea mataaga ina ia faaleleia.
“Lea foi e faafofoga mai le Minisita o Galuega matua’i leaga a o le auala, ma o lea ou te tatalo ina ia faaleleia le auala auā e fiafia tele turisi e asia lea mataaga”.
O le talitonuga a Lagaaia o nisi ia o vaega e tatau ona tagatagai ai le Mālō e le gata mo lona itumalo ae mo le motu tele i Salafai i tulaga tau pisinisi laiti.
