O le asō e lua ni talosaga a le Ofisa o le Loia Sili na tuuina atu i luma o le faamasinoga. O se tasi o nei talosaga e aofia ai le faaleaogaina lea o faamasino e toatolu lea na nafa ma le mataupu i le nofoa faaopopo o tamaitai o le palemene.
E pei ona silafia o afioga i faamasinoga lea na iloioina lea mataupu e aofia ai le faamasino sili Satiu Simativa Perese, afioga ia Vui Clarence Nelson faapea le afioga ia Niava Mata Tuatagaloa.
I se ripoti mai Samoa na taua ai e Maina Vai o le Nofoilo Media , na tuu atu lenei talosaga e le alii loia o loo tulai mo le Ofisa o le Loia Sili le afioga ia Fuimaono Sefo Ainuu ma mafuaaga ona o le tele o talosaga ua tuuina atu e lē manuia lava a latou taumafaiga.
Taua e Fuimaono e lē faatuatuaina faamasino o loo tauaveina le mataupu i le taimi nei. O lea la talosaga o le a iloiloina muamua i le Aso Gafua 31 o Me e tagatagai ai le faamasinoga pe talafeagai mafuaaga a le ofisa o le Loia Sili ona talia lea o le latou talosaga
Ae le gata i lea o nei talosaga a le Ofisa o le Loia Sili na fesiligia ai e le Faamasino Sili ia Satiu Simativa Perese poo le ā le malosiaga a le Ofisa a le Loia Sili latou te fesiligia ai faaiuga fai a le faamasinoga.
