O le tuanai o lena masina o Setema na toe faia ai filifiliga a itumalo o Faleata 4, Siumu, ma Vaa o Fonoti e toe saili ni o latou sui usufono i faalagamaea o upufai o le atunuu i le Palemene, o le Aso Toonai o lenei vaiaso o le a feiloai ai sui faipule ua toe filifilia o ia itumalo ma le taitai ma sui o le vaega faaupufai o le Faatuatua i le Atua Samoa ua Tasi.

O se feiloaiga ua mautu ai le lagolago atu o ia itumalo i le vaega faaupufai ua avea nei ma faigamalo ma suia ai le latou lagolago mai le pati faaupufai e puipuia aiātatau a tagata sa tauva ai o latou sui faipule i le palota tele a le atunuu ia Aperila o le tausaga e 2021.

Peitai na momotu loto o faipule e toatolu mai le toe lagolagoina o lea vaega faaupufai ma faapena ona faamavae ai, ma mafua ai ona avanoa nofoa o ia itumalo ma toe faia ai a latou palota laiti.

O sa ma tapu o faatosina a o lumanai palota laiti sa lē faatinoa ai tu ma aga masani faaleaganuu, ma o le a faatoa faatino i le feiloaiga i le faaiuga o lenei vaiaso.

O le aso 24 o le masina nei e toe tauaofia ai le Fono Aoao Faitulafono, ma o le a faatauto ai ma sui faipule e toatolu ua toe filifilia, le tofa Ale Vena Ale, Mau’u Siaosi Puepuemai, ma le tofa Tuu’u Anasii Leota.

E leai ni tagi o moliaga o ni faiga solitulafono na mafua mai i ia faigāpalota laiti na faaulu atu i le faamasinoga.