O se auaunaga tāua tele i le Soifua Mālōlōina i Samoa, o le tulaga o le malu puipuia ma le saogalemū o soo se taumafa e faaulufale i le atunu’u, aemaise o taumafa e gaseseina auā le fa’aaogaina e le atunu’u lautele.

O le mafua’aga lea o se mafutaga faalea’oa’oga sa lotolotoi ai le Matagaluega o le Soifua Mālōlōina, le Faalapotopotoga o Taumafa a Malo Aufaatasi, Soifua Mālōlōina o le Lalolagi, Matagaluega o Faatoaga ma Faigafaiva ma le Matagaluega o Punaoa, Faalenatura ma Siosiomaga e toe silasila i le faiga faavae lautele e malu puipuia ma saogalemū ai taumafa lea e ta’ua o le National Food Control System Assessment e toe autalu ma fefulisa’i ta’iala e faatonutonu ai Auaunaga a le Malo o loo mata’itūina lea tulaga.

Advertisement

Ua faailoa e le pulega o le Soifua Mālōlōina lautele i se faasalalauga, e tāua le a’oa’oga mo le latou pitola’au ina ia saga faamalosia ai le va’aia lelei o le saogalemū o taumafa mo le tausia o le soifua lelei o tagata lautele, ina ia mafai ai ona taofia ni faama’i e pipisi ma aafia ai le soifua mālōlōina.

O le auaunaga lea a le Matagaluega o le Soifua Mālōlōina mo le silafia, o loo latou asiasia nofoaga o loo fa’atau ai taumafa aemaise i fale’aiga faapea foi ona latou va’ava’aia le saogalemū o taumafa o loo faaulufale i le atunu’u ma faatau atu i le lautele e ala i auaunaga a pisinisi ma faleoloa.