O nisi o faalavelave ua tutupu ma fano ai le ola ma le soifua o nisi o o tatou tagata faigaluega faavaitaimi i Niu Sila ua ave ai le faamanatu a le ofisa sooupu mo tagata faigaluega faavaitaimi mai Samoa i totonu o Niu Sila ia i latou ua sauni malaga mo ia galuega i le tatau ona faatumu pepa o konekarate ma isi aiaiga, ma faailoa ai ma le tagata e mana’o e logo muamua pe a tupu se faalavelave e aafia ai le saogalemu o lona soifua.
Ua faailoa e le ofisa sooupu i lana upega tafa’ilagi mo fesoota’iga televavave, o le tagata e pito latalata sootaga poo le next of kin e tatau ona faailoa, ma o se tagata e vaaia le tagata faigaluega faavaitaimi e uili iai vaega o faamanuiaga tau tupe poo penefiti.
O le tamā, tinā, to’alua poo se isi o le fanau e mafai ona filifili iai le tagata faigaluega e avea ma se tasi e muamua fesoota’i iai ma alu iai faamanuiaga.
Ua faailoa i lea faasalalauga a le ofisa sooupu mo tatou tagata faigaluega faavaitaimi i Niu Sila, e lē o sana matāfaioi le taliina o faaseā ona o ni matāupu e fesiligia ai ia tulaga, ae o lana matāfaioi o le talanoa sa’o i le tagata o le a avea ma sootaga vavalalata i le tagata faigaluega ua aafia i se faalavelave.
O le tagata foi lea o le a talanoa ma le ofisa o galuega faavaitaimi i Samoa.
