O Samoa ma le atunuu o le Atu Malesala poo Marshall Islands ua ave iai se fautuaga malosi a le komiti o Malo Aufaatasi, ina ia faia se galuega e taofia ai nisi o tulaga e pei o le faaupuina o nisi o aiaiga tau tulafono o loo faavaatu’ia ai aiā tatau o tagata e iai o latou aafiaga tumau.
O Samoa ua fautuaina e lea komiti e tatau faia ni teuteuga o le tulafono faavae ma isi tulafono ina ia faamaupu’epu’e ai avanoa tutusa e aofia ai tagata e iai aafiaga tumau aemaise lava faaupuga o tulafono o loo taotaomia ai o latou aiā tatau faatagata soifua.
O le tulafono faavae lava ia ua fautuaina e tatau ona silasila i ni teuteuga e aveesea ai faaupuga e atagia ai le tulaga faasinosinolima ma le faasinoesea ai o tagata e iai aafiaga tumau.
Ua fautuaina foi Samoa ia pasia le tulafono taufaaofi poo le pili mo tagata e iai aafiaga tumau aemaise foi ia aofia i latou i auaunaga ma galuega e faasino i suiga o le tau ma taimi e tutupu ai faalavelave faafuase’i faalenatura.
