I le faagasolo ai o felafolafoaiga o manatu a sui usufono a le Palemene i lana fono usu i se tasi o tulafono taufaaofi i le teuteuga eseese i tulafono pulega autu o laisene 2023, na tali ai le Minisita o Femalagaaiga, Olo Fiti Afoa Vaai e tusa ai o le tulaga i le faaaogaina o kolosi i nofoaga o loo iai aoga e tusa o le laga ai o lenei mataupu e nisi o sui faipule o le maota.
“Ou te iloa lava o le tatou galuega faifaatasi lea ma faiaoga, o le tatou faamanatu ia tatou fanau i le tulaga lava lea o le kolosi pe a oo ina kolosi le auala.
“Ae lau Afioga, e manino lava le tulafono ina ia mataala, lea foi e aoao ii taimi o a matou faiga laisene, o le taimi lava e tu ai le tagata ii poo fanau foi i le kolosi o le taimi foi na e tutū ai taavale, o le taimi foi lena e mataala ai le avetaavale e vaai pito e lua o le auala.
“O la foi ua iai a tatou stop lane line lanu samasama la iai, masalo pe lima mita tua mai o le kolosi.
“Ae ua ou maitauina lava i taeao uma pea ou sau, e iai a ave taavale e le o mafaufau lelei i uiga o laina nei, e o atu lava isi taavale tutū i luga o le kolosi lea e kolosi ai tamaiti aoga ma tagata lautele.
“Ae o le mea, afai e vaai atu e le ofi lau taavale, ona tu lea i tua o le laina lea ae faaavanoa le kolosi e tusa lava pe leai nisi poo fanau aoga e tu pea ae faaavanoa a tatou kolosi.”
Na ta’ua e Olo o vaega nei lea o loo maioio lelei i totonu o aoaoga a le Pulega o Ala Tetele.
“Ia ae ua maua i ituaiga tagata foi ia e alualu galo ona aumai le mea tāua e mafaufau ai ae pei o le tulaga lena.”
