Ua māua nei e le vaega o le vaaitau o tulaga o le maualuga o le vevela o le a faalogoina i le tele o itu o Niu Sila faasolo atu i le faaiuga o lenei vaiaso.
Faamauina mo Hastings o loo vaavalo le oo atu i le 37 tikeri le malosi o le vevela, a o faasolo mai o ea ma savili vevela mai Ausetalia agai mai sasae o le atunuu.
Ta’ua e le vaaitau, o le tele o le atunuu o le a faalogoina le mafanafana o le aso Tofi, a o le’i faasolo atu ina maualuga le vevela e silia ma le 30 tikeri i le faaiuga o le vaiaso, aemaise lava faaitu o East Cape, Gisborne, Wairoa ma Hastings.
Ua fautuaina e ta’ita’i o faaitumalo eseese a latou tagatanuu e tautuanā le tapenapena, ma sauniuni lelei i taimi e faateteleina ai le malosi o le vevela ma tulaga uiga ese o le tau.
Mo le pulenuu o Hastings, Wendy Schollum, ua ia fautuaina lona pitonuu i tulaga o le ‘a’asa o le lā, ia mautinoa iai taumfaina le vaiauli ma ia vaai se paolo ma se malu lelei e mālōlō ai, siaki nai fanau ma tagata matutua, o ē e i tulaga ma’ale’ale ona o le vevela o le tau.
E le gata i lea, ae ua tuuina mai foi fautuaga mai le vaega o tineimu ma faalavelave tutupu faafuase’i i le maualuga o le avanoa e ono tulai mai ai ni mū, ma o le ala foi lea tapu ai ona fai ta’inafi poo le susunuina o ni otaota i lenei taimi; ia ‘alofia ai le ono tula’i mai ai o se mū tele.
Faaopopoopo foi sui o le tineimu, e fautuaina tagatanuu ina ia ‘alo ‘ese mai le faatinoina o ni mea faapāpā ma le fa’aaogaina o masini ma le tele o meafaigaluega e ono maua ai sina motumotu o le afi.
Puna o Faamatalaga: https://www.rnz.co.nz/news/national/583549/hastings-tipped-to-be-hottest-spot-as-temperatures-rise-around-the-country
