I le faaopoopo ai o le numera o ē ua aafia i tagata ua mama’i i le misela, o lea ua lipotia mai le taofia ai ona aga’i atu fanau a’oga o le Wellington Girls’ College i le a’oga , o Vasega 9–11 ae ia mālōlō lelei i le fale, ina ua faamaonia sa auai se tasi o tama’ita’i a’oga i le laugatogi a le kolisi a ua maua o ia i le faama’i.
Faamauina e lata i le 900 tagata na fesoota’i iai poo close contact.
O lea ua faamanino mai le aga’i ai o fanau a’oga o vasega eseese o le kolisi e faaaogā auala faaneionapo, e ala i fesoota’iga televavave poo le online, a o faasolo iloiloga i fanau ma a latou tuipuipui.
Ta’ua e le Ulu A’oga Julia Davidson, na faatino lava tulaga uma o puipuiga e pei ona faailo le māta’itūina lelei o vaega uma i puipuiga mo fanau a’oga e tusa ai ma fautuaga a le soifua mālōlōina, ae na faatino foi la latou pitolaau o le faaauau ai o fuafuaga faataatitia a le a’oga ona o le fautuaga mai le Matāgaluega o A’oga e lē moomia ona taofia fua fanau mai le lē auai atu i a’oga.
Maitauina o se matāupu o loo iloa manino mai ai le lē fesoota’i o Matāgaluga e lua, aemaise o se matāupu ma’ale’ale ua vaaia ai le aafia o le to’atele.
O le mea moni ua lē iloa e le a’oga poo ai a faalogo iai, poo le mea e taofi fanau mai le oatu pe leai.
Ae ua faaalia e le alii Palemia le lē tatau ai ona pepesi lenei faama’i i totonu o Niu Sila, pe a taga’i ia Niu Sila ma le tulaga o loo iai (first-world country) o lona uiga o Niu Sila o se atunuu ua maualuga lona atina’e, ma e tatau lava i mātua ona ave a latou fanau e fai o latou tuipuipui.
I faamatalaga mai le Health NZ, na faamanino ai, a fai ae ua uma ona fai tuipuipui e 2 o le MMR o lona uiga, e matua’i telē lava le malupuipuia o le tagata mai faama’i, e pei ona faamauina e oo atu i le 99% le malosi o puipuiga.
