A o faasolo pea galuega faatino a le Auaunaga o le Soifua Mālōlōina i le taofia ma le tau tineia o le pepesi o le faama’i o le misela i totonu o Niu Sila nei, ae o lea ua oo mai foi faamatalaga e tusa ai ma fautuaga i popolega i le ono aafia o fanau a’oga o le Auckland Grammar, talu ona māua ai sa iai se tasi ua maua i le misela i totonu o le a’oga ma e to’atele i latou na fesoota’i atu i lē ua maua i le faama’i.
Ma ona o lea tulaga na tuuina mai ai loa se fautuaga a le Ulu A’oga ma le vasega o faia’oga ina ia mālōlō Vasega 9 ma le Vasega 10 a le a’oga i fale.
Na faamaonia e le Ulu A’oga, Tim O’Connor sa iai le tagata ua aafia i le a’oga i le Aso Faraile 24 o Oketopa.
Ua faaalia foi, o lea ua amata faasolo sa’ili’iliga i ē na fesoota’i atu iai lea tagata.
Ua faamanino mai foi e le Auaunaga o le Soifua Mālōlōina, le faatino ai o a latou iloiloga i le tulaga o iai fanau a’oga ma o latou tuipuipui, aemaise i latou e le’i faia tui o le misela, mami, ma le rupela (MMR vaccine) i le faato’ā atoa ai o le 12 masina o o latou soifua.
Ta’ua e le Ulu A’oga o le faai’uga e faamālōlō fanau mai le o atu i le a’oga, o se vaega na taunuu iai faasoa ma felafolafoa’iga a le pulega ma sui o le soifua mālōlōina.
Faamaonia mai e le’i fesoota’i fanau o vasega matutua i lē ua aafia, ona o loo i fale fanau mo tapenaga o su’ega.
Ua faaalia e lē o faataga ona ulufale se tamaitiiti e le’i faia tuipuipui se’i vaganā ai ua tuuina mai se faaaliga ua saogalemū le toe aga’i atu.
Mo le silafia o lea ua oo atu nei le numera o tagata ua maua i le misela i le to’asefulu ma le tolu (13) i Aukilani, ae mo le itu o Northland lava ia e to’a sefulu ma le lua (12) e pei ona maua ai le numera e (25).
E silia ma le 2000 tagata i totonu o le atunuu ua faamauina o ē na fesoota’i atu iai i latou ua aafia i le misela.
Puna o Faamatalaga: https://www.rnz.co.nz/news/national/577364/measles-outbreak-auckland-grammar-school-students-told-to-stay-home
