O loo faagasolo i le vaiaso nei i Tuasivi i Savaii se aoaoga o loo auai faamasino o le Faamasinoga o Fanua ma Suafa sa tatala e le tamaitai Minisita o le matagaluega o faamasinoga ma le faafoeina o mataupu tau faamasinoga le tofa Matamua Vasati Sili Pulufana.

O le saunoaga a le tamaitai minisita sa ia ave ai le tuualalo i faamasino ma faailoa ai nisi o faitioga ua oo atu i lona ofisa.

O nisi o ia faitioga o le mae’a ona lau o se faaiuga ae ua tulituli le faaiuga tusitusia e ni itu auai o se mataupu, e mafua ona e lei saini uma faamasino ona ua malaga i fafo.

Faaalia e le Minisita e ono fesiligia ai le faamaoni o faamasino i le faatinoina o o latou tiute.

O se tasi o faitioga ua fela’ua’i suafa o molimau o itu tau faamasinoga, ma se isi faitioga o se mataupu tau fanua ua aumai le faaiuga ua sese le faaigoaina o se fanua, poo se laoa ma se maota.

O isi faitioga o le toe faamaninoina o se tuaoi o se fanua o loo faaaogā laau e pei o niu e fai ai le tuaoi.

Faaalia e le Minisita i lana saunoaga o sona vaivaiga mai lana pitolaau, e na o le tasi le auala e mafai ai ona tali atu i tuuaiga o le tapena lelei o faaiuga tusitusia, ina ia mafai ai ona talitonuina ma faatalitonuina le atunuu lautele.

O se aoaoga o loo fesoasoani i le faatinoina o galuega a faamasino, ma o loo faafoeina e le Peresetene o lea faamasinoga le afioga Lesatele Rapi Vaai, o le sui Peresetene le afioga Afamasaga Michael Soonalole, ma se tamalii o le atunuu sa avea ma faamasino o le faamasinoga maualuga i tausaga ua mavae le afioga Tagaloa Enoka Puni.