I le savalia ai nei o le 33 tausaga talu ona tatala le palota o tagata ua aulia le 21 tausaga o le soifua ia tatou faiga filifiliga pe a saili sui faipule o itumalo i le Palemene, o se tasi o fautuaga a le Komisi suesue o faigapalota na silasila i tulaga sa faafoe ai le palota tele a Samoa i le tausaga e 2021, ia suia le tausaga e agavaa ai ona palota i latou e lei umia ni suafa matai mai le 21 i le 18.

O le tausaga e 1990 i le palota faalauaitele le pelepesite na ave ai le fesili i le atunuu pe talia le palota o le 21 tausaga sa maualuga le lagolago a le atunuu.

O lea suiga na aveesea ai le palota na o tagata o umia suafa matai ua lesitala faaletulafono pe a faia palota e saili ai sui usufono o le Palemene.

O lenei fautuaga ua faavae i le mae’a o faatalatalanoaga a sui o le komisi suesue ma alii ma tamaitai o kolisi maualuluga ma le Iunivesite aoao a Samoa.

Sa faaleo ai nisi o lagona i le naunautaiga o tupulaga talavou e fia palota i le 18 tausaga.

Faaalia i le fautuaga a le komisi suesue i le latou lipoti, ua iai se malamalamaga o ia tupulaga i tulaga tau palota e mafua i faasalalauga faalauaitele poo awareness programmes, faasino i le tāua o le auai i le palota mo le filifiliga o taitai o le atunuu.

E mafua mai lea manatu ona o tulaga tāua o loo aafia ai i latou pe a atoa le 18 tausaga e pei o le mafai ona faaipoipo faaletulafono, mafai ona faigaluega maua le totogi ma totogi lafoga.

Ua mafai i lea matutua ona fai se mavaega poo se uili, mafai ona resitala o se tagata matua i aiaiga o le tulafono o loo faamauina ai ē fananau, o ē maliliu ma tagata e faaipoipo.

Ua mafai foi ona faasala o se tagata matua i ni faaiuga tau faamasinoga, ma ua agavaa foi ona maua le laisene ave taavale lea a 17 loa tausaga le matua ua mafai ona maua.

E 12 atunuu o le Pasefika ua tatala le palota o tupulaga ua 18 tausaga le matutua, ae o le atunuu o Nauru ua tatala le palota o le 20 tausaga.

Ua na o Samoa ma Tonga o loo tatala le palota o le 21 tausaga le matutua.

O faamaumauga ia ua faailoa e le komisi suesue i lana lipoti ua faavae ai le latou fautuaga. 

I le fautuaga a le Komisi suesue ua taoto nei i le laulau a fono a le Palemene, e le gata ina fautuaina le tatala o le palota o tagata ua aulia le 18 tausaga o le matutua, ae ua fautuaina foi le faavae o se maota o Puleono ma Tumua e amanaia ai le sao tele o itumalo māvae poo Tootoo taualoa o le atunuu.

O le finagalo maualuga o le Komisi suesue e iai le uta ma le tofa mamao a Tootoo e toe iloilo ai upufai o Samoa i faigamalo lelei ma le taualoa, e taula iai a tatou tu ma aganuu, aemaise o a tatou agaifanua ma le faakerisiano.

O le palota faalauaitele poo le constitutional referendum na faia ia Novema o le tausaga 1990 lea na ioeina ai le palota o le 21 tausaga, na teena e le atunuu le fesili pe finagalo i se isi maota e lua iai maota e lipoi ai upufai o Samoa.

O le a faasolosolo atu i lenei tautua o aso taitasi, fautuaga a le komisi suesue o faigapalota na silasila i le tulaga na faatino ai le palota tele mulimuli a le atunuu na faia ia Aperila o le tausaga e 2021.