Ua tatala ma faaaoga le faatanoa vai fou ua maua ai e aiga o le afioaga o Laulii i le itumalo o le Vaimauga le suavai mamā i se fesoasoani mai le kamupani o le China Harbour, ua latou faatu se vilimaa i le vaega mamao i uta i atumauga o le nuu, i le faamoemoe e maua ai le maa mo le galuega o le toe faaleleia o le uafu tele i Apia.
O Laulii o se tasi o nuu o loo maua lava e aiga le suavai taumafa mai vai o loo tafe mai atumauga i uta ma o se tasi foi o afioaga e ‘oa lona laueleele i vaitafe.
E lima selau afe pe afa miliona tala na fausia ai e le kamupani vilimaa o le China Harbour le faatanoa vai fou mo le nuu, ma ua mamao ese le nofoaga o le faatanoa vai ma le vaega o auvae mauga o loo faia ai le galuega a le kamupani, ma o se fuafuaga na faia ina ia faatumau ai pea le mamā ma le saogalemu o le suavai o loo faaaoga e le nuu.
Le afioga i le Sa’ofaapito le afioga Leniu Vainiu Te’o i le sauniga na tatala ai le faatanoa vai fou, lea foi sa valaau faaaloalo ai le nuu i le minisita o tina ma tamaitai atinae o nuu ma afioaga ma aga fesootai, na te molimauina le galuega.
Le minisita o tina ma tamaitai atinae o nuu ma afioaga ma aga fesootai, le afioga Leota Laki Sio Lamositele.
