O se tamā e to’alua nai ona alo, na fana i fafo o se fale i Melepone a o moe ai i totonu o le fale se teineitiiti ae sola ese le tagata na fanaina lea tamā i se taavale sa soso’a atu ai ma taavale a tuaoi.
Fai mai le 9News o lē na aafia e suafa ia Kevin Mckean na aga’i ane e asiasi i le fale o se tamaitai i Gippsland i le itu i Saute i Sasae o Melepone ae fana ai e le tagata i fafo ane o lea fale.
Na sii ane i Alfred Hospital ma faavave ai le faiga o le taotoga e aveese ai le pulufana.
Ua ta’ua i le lipoti o le leotele o le pa’ō o le faalavelave na fafagu ai tuaoi ma le teineitiiti 10 tausaga sa moe ai i totonu o le fale lea.
O loo lipotia na sola ese le tagata na faatinoina le faalavelave faatasi ma le isi na o la to’alua na tietie atu i se pasika.
O loo tau sa’ili e leoleo le mafua’aga o lenei faalavelave ae ua faailoa foi o se osofa’iga sa taula’i i le tagata na aafia ma e masani i latou o loo aofia i lenei mataupu.
Puna o Faamatalaga:
