Ua nofosala i le falepuipui se alii tausi soifua 29 tausaga le matua ona o se solitulafono na ia faia na aafia ai se tamaitai tausi soifua ua 28 ona tausaga.
Ua faasā i se poloaiga a le Faamasinoga Maualuga ona faailoa suafa o lē ua nofosala ma lē na aafia, ae o faamaumauaga a leoleo sa folasia e le faamasinoga i le taimi na lau ai le faaiuga sa ta’ua ai o le alii tausi soifua sa galue i le vaega o le maota gasegase o Tupua Tamasese Meaole i Motootua e vaai ai mata poo fofoga.
O le 11 i le po o le Aso Lulu 24 o Me o le tausaga na tea nei na tulai mai ai le solitulafono, ina ua faaoolima lē ua nofosala i lē na aafia i le faamoemoe o lē ua molia e faatino se faiga aiga.
Sa faaalia e leoleo e tupu le solitulafono ae ua iai se suli o lē ua nofosala ma lē na faia iai le solitulafono.
Na faailoa foi e leoleo o le solitulafono na faatino i se potu o le falemai o mata le Eye Clinic i Motootua.
Na faamatala e lē na aafia i le lipoti a le ofisa faanofo vaavaaia le iai o ona lagona fefe i le mea na tupu ma e lē galo tiga na oo ia te ia ona o le faaoogalima.
Na faailoa i le faaiuga a le faamasinoga, o le solitulafono na faia e lē ua nofosala i le falepuipui o loo aiaia i le tulafono o puipuiga faalotoifale i totonu o aiga le Family Safety Act o le tausaga e 2013.
E 2 tausaga ma le 5 masina le umi o le faasalaga faafalepuipui o lē ua faamaonia lona moliaga o le faaoolima ma le faamoemoe e faatino ai se faiga aiga.
