E oo mai i le taimi nei o loo nonofo pea le faitau selau o tagata na faaleagaina fale i Aukilani ona o lologa i faletalimalo, poo hotels ma motels.
O konekarate nei talu mai Fepuari ua faaalu ai e le malo le silia ma le $27 miliona e totogi ai Temporary Accommodation Service.
E ui i lea aofaiga tele e le o faigofie le tau sailiga o fale e sulu iai tagata ua leai ni fale i Aukilani, ma i molimau a le Temporary Accommodation Service ona o lea o loo tuu atu ai pea le saolotoga e nonofo ai i latou nei i faletalimalo i le umi e mananao ai.
I se lipoti a le leitio a Niu Sila o loo toe molimau ai nisi o i latou nei o tagata Muriwai faapea nisi mai Massey, ma i tala e lei faigofie i aiga nei le taumafai e saili fale e o iai ona e le gata o le toatele ae a maua foi se fale e fai lava si mamao.
Na ta’ua e le sui o le Temporary Accommodation Service o lea lava foi o loo galulue la latou pulega e saili ni fale e ave iai aiga nei o loo nonofo pea i faletalimalo.
O fale lē tumau nei o loo fesoasoani le malo e totogi, ma e foliga mai e le iloa se taimi e maua ai ni fale mautu e agai iai i latou o loo nonofo i Temporary Accommodation poo le silia ma le 400 aiga.
O aiga foi nei ua oese ma fale na faaleagaina ae o loo totogi lua le mokesi ma fale lē tumau o loo nonofo ai i le taimi nei, o lea o le a iai le isi fesoasoani tupe mai le malo e agavaa iai mai le aso 4 o Setema, ma o lea foi e toe faafoi i tua i le aso 1 o Iuni le aso e amata totogi mai ai peimeni ua ta’ua o Temporary Accommodation Assistance.
