O le faitau aofai o tagata i Samoa i le Tusigaigoa o le tausaga na tea nei 2021, o lea ua faalauiloa i le tulaga aloaia faamaumauga uma o lea galuega ua faamauina ai se siitaga o le aofai o tagata e 9,578 faatusatusa i le faitau aofai o le atunuu sa iai i le Tusigaigoa o le 2016 poo le lima tausaga ua mavae sa faamauina i le 195,979 o le faitau aofai lea sa iai le atunuu e tau mai i le tausaga 2021 na toe faia ai le isi tusigaigoa i le aso 6 o Novema.
Ua aloaia ai i faamaumauga fou o fuainumera o le faitau aofai o le atunuu ua iai nei e 205,557. I lea aofaiga ua iloa i le tusigaigoa o le tausaga na tea nei le faatupulaia o le numera o tagata o loo alala i le itu i Matu o le motu o Upolu ie 37 pasene, ae 18 pasene o loo nonofo i le vaega tutotonu o le talafatai o Apia poo le Apia Urban Central area.
O le itumalo faapalota o Faleata Tasi ua faamauina o loo pito toatele tagata o loo alala ai e 6 pasene, ae o Falealupo i Savaii o le itumalo palota lea ua faamauina o loo pito toaitiiti tagata o loo alala ai e 0 tesimale 4 pasene.
O le faitau aofai fou o le atunuu ua faaalia i le taunuuga o le tusigaigoa e pito toatele ai le numera o le itupa o tama tane poo alii e 51 pasene ae o tamaitai e na o le 49 pasene.
Peitai ua maua i lea galuega e pito ola ma soifua umi tamaitai e oo i le matua o le soifua e 77 tausaga, ae o tama tane e 74 tausaga o le soifua.
I le itu i tapuaiga poo lotu o loo maualuga pea pasene o tagata tapuai i le Ekalesia Faapotopotoga Kerisiano Samoa e 27 pasene, pito atu iai le Ekalesia Katoliko e 19 pasene, lona tolu o le aofaiga o tagata lolotu o le Ekalesia a Iesu Keriso o le Au Paia o Aso e Gata Ai e 18 pasene, lona fa o le Ekalesia Metotisi e 12 pasene, ma le Faapotopotoga a le Atua poo le Assembly of God e 10 pasene.
O isi tapuaiga ma lotu ua faailoa i le taunuuga o le tusigaigoa sa faamauina ai le aofai o tagata ma aiga taitasi ua siitia uma le numera o tagata lolotu i le 16 pasene.
E tasi le miliona 803 afe, 560 tala le tupe a le Malo na faaalu i le galuega o le tuufaatasia uma o faamatalaga o le tusigaigoa, ma le selau afe tala na fesoasoani ai le faalapotopotoga o le UNFPA.
O le galuega lenei i le tausaga na tea nei o le 11 ai lea o tusigaigoa talu ona tutoatasi lo tatou atunuu ia Ianuari o le tausaga e 1962.
Ua faailoa e le Ofisa Sili o le ofisa o numera faamaumauina a le Malo sa galulue i le tusigaigoa le afioga Leota Aliielua Salani i le faatomuaga o le lipoti autu o lea galuega, o se galuega sa feagai ma fita ona o le taimi lea o loo vevela le pipisi o le faamai Koviti-19, aemaise o le maliu faafuasei o lē sa avea ma faauluuluga o le ofisa le faletua le afioga Aliimuamua Malaefono Tauā Faasalaina Taaloga.
