E 4 miliona tala Amerika ua faamatuu e le faalapotopotoga o tupe ua ta’ua o le International Finance Corporation le IFC, mo le faia o galuega e una’ia ai le atina’e o pisinisi laiti ma pisinisi feololo.
O lea fesoasoani ua galulue ai lea faalapotopotoga tau tupe faavaomalo ma le Faletupe o le National Bank of Samoa le NBS, e faagaioi nonogatupe e faatino ai lea faamoemoe mo nisi o loo fia atina’e ni pisinisi poo pisinisi foi o loo faatino ae ua manaomia se isi lagolago tau tupe e saga faaleleia atili ai.
O le faiga paaga lenei a le IFC ma le faletupe o le National Bank a Samoa ua taulai i le ituvai o tina ma tamaitai o loo lotolotoi i le faia o pisinisi laiti ma pisinisi feololo i totonu o alamanuia tau faatoaga.
O le faamoemoe e faatupe e le IFC ma lea faletupe le 50 pasene e toe faaola ai ni seleni pa’ū ma le faamoemoe e taulai lea fuafuaga i le lagolagoina o nonogatupe e faamatuu e faagaioia ai ia taumafaiga tau pisinisi.
Na faaalia e le Ofisa Sili o le pulega o le National Bank of Samoa le susuga Sam Swann, o se taimi muamua lenei ua faatino ai lea ituaiga o fesoasoani i le faatupega o atina’e tau pisinisi i le naunautaiga e faaosofia ai lagona o le itupa o tina a tamaitai o le atunuu e auai i faiga tau pisinisi e atina’e ai faatoaga.
Faaalia e le Pule o le IFC i Ausetalia, Niu Sila ma le Pasefika le tamaitai o Judith Green i se pepa o faamatalaga, o se sao lelei ma tāua tele lea ua faia e le latou faalapotopotoga tau tupe faatasi ai ma le faletupe o le NBS e fesoasoani ai i le toe faaleleia o le tamaoaiga o le tatou atunuu.
