O le aoaoina lelei o tagata faigaluega o tautua i auaunaga eseese a le Malo, o se manulauti ua faipa’aga ai le Matagaluega o Galuega tetele ma felauaiga a le Malo o loo iai auaunaga o le malosi tau eletise, le pulega o feoaiga i luga o le laueleele ma le pulega o le suavai, ma le kolisi o matata eseese a le Malo o Auisetalia o loo faagaioia i le nofoaga o iai le Iunivesite Aoao o Samoa.
Ua mafai ona faatino lea faigapaaga i se maliega ua sainia e le APTC le Australia Pacific Training Coalition ma ia auaunaga a le Malo.
O le ta’ua o lea maliega o le a mafai ai ona avanoa ai le toe faalauteleina o tomai o ē o loo galulue i lea matagaluega a le Malo i matata o loo latou tauaveina.
O le autu lava lea e tasi ua sainia ai foi e le APTC se maliega ma le Matagaluega o Aoga Taaloga ma Aganuu mo le siitia o le aoaoina o tomai tau taaloga e pei ona faamautu lea maliega ma le pulega o le Lakapi Samoa.
O le matagaluega foi o leoleo falepuipui ma le ola toe fuataina faapea le pulega o le tineimu ma galuega laveai ua sainia foi lea maliega ma le APTC i le faamoemoe lava o le aoaoina lelei o tomai ma agavaa o tagata faigaluega.
O afioga i Minisita o ia matagaluega a le Malo na latou molimauina le sainia o ia maliega i le vaiaso nei, ma le sui o le Malo o Ausetalia ma le pulega o le APTC.
