E le o talia gofie e nisi o aiga Aukilani le faaiuga a le Kainga Ora o le a tuu ai lalo nisi o ona fale i Magele.

O lea ua faamautinoa mai e le Kainga Ora e 19 ona fale i Pito Place i Magele o le a tuu i lalo ona i le mae’a ai o lologa na iai i le Auckland Anniversary i le 27 ma le 28 o Ianuari ua iloa ai e le saogalemu i se nofo ona e lamatia gofie i lologa.

I se pepa o faamatalaga ua faailoa ai e le sui o le pulega ananafi o lea ua faafesootai aiga sa nonofo totogi i fale nei e 19 ma faatalanoa le faaiuga aemaise o le toe sue o nisi fale e agai iai.

Peitai e iai nisi ua toe molimau i tala a le 1News e le o fiafia i le faaiuga a le Kainga Ora ona o lea ua aafia atu ai ma nisi o fale e lei lolovaia.

Molimau a Rahui Maru o lē ua 18 tausaga o nofo i se tasi o fale nei o le a tuu i lalo e le o fia alu ese ma o lea foi e lei alu atu i totonu o le fale le vai o lea sa gata lava i sitepu.

Ua māua e tala fou e tolu masina lea ua tuu atu e le Kainga Ora i aiga nei e tapena ese ai.

Ae i le tuufaatasiga o fale a le malo lea o loo i lalo o pulega a le Kainga Ora na faaleagaina i lologa faatoa uma atu, e silia ma le 590 ona fale i Aukilani.