Atonu ua e faafofoga pe silasila foi i ni faamatalaga poo ni lipoti e faatatau i ni peimeni mai le Centrelink e te ono agavaa ai, pe na e silasila ai foi i se post a sau uo i luga o le facebook pe talanoa ai foi nisi.

Atonu foi sa e sa’ili pe faamaonia ia lipoti ma su’e ai i luga o le google ma e ono vaaia ai se upega tafa’ilagi o loo faamatala au’ili’ili mai ai ia peimeni ma e manatu ai o se mea moni, peitai e leai, o ni faiga taufaasese uma.

Ua ta’ua i lipoti a le ABC o ia ituaiga news sites poo upega tafa’ilagi e maua ai talafou e ono faaseseina ai tagata ma lusi ai ni tupe a nisi.

Ua faamanatu mai ai i le lipoti le mana’omia o le mata’ala o tagata i lenei foi vaitau o le tausaga ma le to’atele o le autaufaasese.

O le faamanatu ua tuuina mai ia silasila ma le toto’a ma siaki muamua pe faamaonia ia faamatalaga ma aua ne’i faigofie ona faamatuu atu ou faamaumauga tau tupe poo faamatalaga foi e faatatau ia te oe.

O mea uma ia e mafai ona faaaogā e le autaufaavalea e maua ai ni a latou tupe.

O le isi faamanatu ua tuuina mai le Services Australia ia aua le amana’ia ituaiga faasalalauga ia ma ulutala taufaasese e faasee ai ma faatosina ai tagata e oomi ae uma ane ua lusi ai tupe ma amo ai foi ni avega i le vaitau o le Kerisimasi.

Puna o Faamatalaga: https://www.abc.net.au/news/2024-12-20/centrelink-payment-scam-600-carer-supplement-/104672880