Ua maitauina le faatuputupula’ia o faigata ma luitau ua feagai ma le atunuu ma ua tele ina aafia ai vaega ma’oti tau faatoaga ma faigafaiva ona o le maaleale o suiga ua iai nei le tau.
O le taeao nei lea na feiloai ai le Matagaluega o Faatoaga ma Faigafaiva faatasi ma paaga o le aufaifaatoaga, faifaiva ma le aufailafumanu se’i aoao manogi auā le tuufaatasia ai o se faiga faavae e mafai ona tua iai pe a afea le atunuu i mala faalenatura.

Na faaalia e le Minisita o Faatoaga ma Faigafaiva, Laaulialemalietoa Polataivao Schmidt o le ala lea ua faatāuaina ai le fausiaina o se faiga faavae ina ia maioio lelei ma faavasegaina ai fuafuaga ma atina’e talafeagai e aga tonu aafiaga eseese.
“O ia luitau ua tele lona aafiaga i vaega ma’oti tau faatoaga ma faigafaiva ma tauau ina maaleale ma tulaga faaletonu ai atina’e o laau totō, lafumanu ma faigafaiva ma e ono avea ma faafitauli i le maua pea o taumafa ma tupe maua mai i atina’e tau faatoaga ma faigafaiva.
“O se faavae fou ua manatu le matagaluega ua tatau ona fausia ona ua maitauina pea le tulaga lamatia ma le tetele o suiga o le tau ma e lē o iai se faiga faavae poo se policy e puipui ai faatoaga ma faigafaiva i le tulaga lea ua tatou iai.
“Ua manatu ai ua tatau ona fai se policy o lea la ua atoa nei le 4 i le 5masina o tapena ma o le asō lea ua valaau uma ai stakeholders e lē gata ia i latou uma lava o faalapotoptooga tuma’oti, matagaluega fesootai a le malo ia ma isi itutino uma e galulue faatasi ma le matagaluega e omai e toe fai le faatalanoaga mulimuli.
“Ona o le tāua tele o le aafiaga e lē tatau ona iai se mea tatou te toe o masalosalo ai e tatau ona atoa lelei faatalanoaga o matagaluega faalapotopotoga asosi ua manatu e toe omai tasi lava e matuā fai lelei le faatalanoaga i le asō.
“O lea ua uma ona faataatia le draft e tāua tele le iai o le leo o tagata taitoatasi uma lava o faatoaga faigafaiva ma lafumanu i lona vaega mulimuli.
“O itu tāua na e ao ina manino ma malamalama lelei iai finagalo o i latou o loo aafia e lē gata i le matagaluega o faatoaga ma faigafaiva ae o a tatou paaga uma.
“E tatau ona iloa le mea lea ua tupu, o le ā le tulaga lea ua iai le vevela o le la, o le siitia o le suasami, o le ā le tulaga o le oona o le suasami, o le ā le tapenga e fai e tatau ona tapena tatou tunnel houses tapena tatou weather proof facilities e mafai ona toto ai kapisi tamato ma isi pe timu pe la ae o la e mafai ona fai.
“E tatau ona tilotilo i le auala e toe faafailele ai isi fua o faaeleeleaga ua mafai ona cater le vevela ma le mea lea e alu i le taimi nei.” 
Ua tatou vaai ua faaopoopo aso malulu ua iai foi taimi o ogasami sa mafanafana ae o lea ua vevela o suiga na e lē mafai ona tatou taofia ma e tatau ai la ona fai aiaiga mo tapenga a le aufaifaatoaga auā o lea lava e sau le mau faafitauli.
“E fai foi la o suiga tetele o le tau ae o suiga o loo tutupu ona o le fesuiaiga o aiga ua atili ai ona lē mafai ona fai faatoaga ona ua leai ni tagata faigaluega so much challenge ua lē mafai ona faaauau le manpowwer ua leai ni tagata ua lē mafai ona faaopoopo le tulaga sa malsoi ai le mauaina o fua o faaeleeleaga i tulaga siitia.” 
Ta’ua e Laauli o lea ua tilotilo i le faaaogāina o masini mechanization ma le tulaga e alualu lava lona uiga e oo a le mea lea na iai muamua Samoa o le auina mai o tagata mai fafo e galueaina faatoaga a le atunuu.
“O le ā le tatou mea e fai ae oso se afā fulifaō taeao ia iloa le data, tasi lena vaega tāua ia malamalama lelei poo ā mea ia e tutupu i le taimi lenei o mea uma lava na o loo taumafai nei e aoao ona fai loa lea o le tatou tapenaga mo le isi 5 i le 10 tausaga e o faatasi ma faiga faavae ia e tatao pea iai le matagaluega ia lava taumafa i le atunuu ma ia maua tupe mo tagata.”
Mai i le tele o tausaga ua mavae, e lei mafai ona maioio ma manino le vaai i aafiaga o suiga o le tau e patino tonu i itu tau laau totō, lafumanu ma faigafaiva. 
O loo i ai le faamoemoega autu, o lenei faiga faavae o le a taatia ai se auivi o galuega faatino mo paaga uma a le vaega ma’oti tau faatoaga ma faigafaiva, faapea paaga tau atina’e mo le faatinoina ma le faatupeina.
 O se galuega soosoo tau’au ma faapaaga a o tatou tagata ina ia mau Samoa i itu tau taumafa, faapea le manuia lautele mo nai o tatou tagata nei ma a taeao.