Ua fiu lava e toe taumafai atu i nai minute faaiu o le taaloga mo se ‘ai peitai ua faigata talu le lelei tele o le puipuiga a Nigeria lea na faia’ina ai le ‘au a le Matildas a Ausetalia i le po anapo.
O le lona lua ai lea o taaloga a le Matildas ma sa faamoemoe lava e manuia e maua ai foi se avanoa mautu i le pa’ū ma nofo peitai la o lea ua manaomia lava ona manumalo ia Kanata lea o le a sosoo mai lana taaloga ina ia maua ai pea se avanoa i le taamilosaga.
O Kanata o le siamupini lea o le taaloga i le Olimipeka ma e le taumate o le a matuai faigata lea taaloga mo Ausetalia.
Sa finau le taaloga i le po anapo ma e ui ina toe malosi mai Ausetalia i minute faaiu o le taaloga ae lei vaivai ai foi le puipui atu a Nigeria ma malo ai i ‘ai e 3-2.
O taaloga o le Ipu o le Lalolagi i le asō i le soka e fetaui ai Argentina ma Aferika i Saute i Dunedin, Egelani ma Denmark i Sini ma Saina ma Haiti i Adelaide.
