I le 20 tausaga o faatali nisi o suli o le suafa Mata o le afioaga o Vaimoso i latou o alala ma aumau i atunuu i fafo, i le aso e suesueina le gasegase a malo a lo latou aiga e le faamasinoga o Fanua ma Suafa, e faatulaga ane le aso e tagofia ai i le masina o Novema o le tausaga e 2021 ua feagai le lalolagi ma aafiaga o le faama’i o le Koviti-19, ma faigata ai feoaiga ona ua loka tuaoi o atunuu e aofia ai ma Samoa ma ua lē toe faatagaina ona āfea i ni malaga a vaalele.
E faalua ona talosaga suli o le suafa Mata o alala i fafo mo se avanoa e tolopō ai ona ua loka tuaoi peitai sa tē’ena ma lē talia e le Peresitene o le Faamasinoga o Fanua ma Suafa sa tauaveina lea tulaga i le tausaga e 2021, ma sa fa’aauau ai ona su’esu’e le mataupu ae na o se tasi o suli na fai ma sui o i latou i fafo na auai.
Sa mafua ai ona ave le talosaga a ia suli i le Faamasinoga Maualuga e faia se iloiloga faaletulafono i le aafia oo latou aiā faasuli ona ua lē auai e mafua i aafiaga mai le faamai o le Koviti-19.
Peitai, na faaulu e le Faamasinoga o Fanua ma Suafa se talosaga e taofia ai le faia o lea iloiloga i le finauga e faapea sa sosolo lea faamasinoga i aiaiga ma ta’iala a le faamasinoga e su’esu’eina ai ni mataupu pe a le avanoa ni itu auai o se mataupu tau faamasinoga.
Peitai ua maea ona su’esu’e lea talosaga ma aumai ai le faaiuga a le afioga i le Faamasino Sili, le afioga, Satiu Simativa Perese ma ua fesiligia ai le Peresitene o Faamasinoga o Fanua ma Suafa i le leai o sana silasila i le umi o tausaga o taatia le mataupu, ma le tulaga sa taofia ai femalagaiga faavaomalo ona o le faama’i o le Koviti-19.
Ua faia ai le faaiuga a le faamasino sili e te’ena le finauga e taofia le suesueina o le talosaga mo se iloiloga faaletulafono ae faatonu le tuuina atu o le talosaga a se vaega o suli o le suafa Mata o Vaimoso e faatulaga se aso e tagofia ai.
O taualumaga a le faamasinoga maualuga i le Aso Gafua o lenei vaiaso fou o le a tuuina atu ai le talosaga mo se iloiloga faaletulafono poo se judicial review ua faaulu e faatulaga se aso e suesue ai.
O i latou ua faauluina lea talosaga o Fonoti Pagamalie Kalolo Stowers, Toomata Paulo Stowers, Toomata Veronica Stowers, Tasipale Mikaele, Toilolo Pio Stowers, Conzuella Sheppard, Tumua Justin Stowers, ma Tauiliili Sulitalevi. O loo molia ile latou talosaga le faamasinoga o fanua ma suafa.
