Ua toe usua’i fanau a le atunuu i le toe amatalia o le latou olaga faaleaoaoga o lenei tausaga fou, ina ua tuanai malologa masani o le faaiuga o seleselega o le la tausaga ua alu atu.
O se tausaga ese lenei i le matau atu i tapenaga a le matagaluega o aoga taaloga aganuu ona o nisi o suiga fou ua faailoa e le Ofisa Sili o le pulega o lea matagaluega tele a le Malo, le afioga A’eau Chris Hazelman na faatoa filifilia e na te tauave le faauluuluga o le matagaluega i le lata i le faaiuga o le tausaga na tea nei.
O se tasi o suiga ua faailoa e le Ofisa Sili i luga o auala o fesootaiga a le Malo, o le umi o vaiaso mo kuata e fa faaleaoaoga o le tausaga.
Ua faailoa e A’eau i ia fesootaiga e tāua le olaga aoaoina o le fanau ma e tatau ai ona fuafua lelei le umi o lea kuata ma lea kuata.
I le 15 o vaiaso sa masani ona faagasolo ai le kuata muamua, o lea ua faatulaga mai e le Ofisa Sili e na o le 10.
E faapena foi i le kuata lona lua ma le tolu ae a oo i le kuata mulimuli le kuata lona 4 e valu vaiaso.
O tuuaga mo le kuata muamua i le kuata tolu e lua, ae o le tuuaga umi pe a mae’a le kuata lona 4 e valu vaiaso e malolo ai.
O lea fuafuaga fou e iai le talitionuga o le Ofisa Sili o pulega o le a mafai ona galulue punouai ai faiaoga i le latou pitolaau tauave o le faamaoni i le aoaoina lelei o fanau, ma lava ai le taimi e malolo ma toe tapena i le faaauauina lava o le faafaileleina o mafaufau o tama ma teine ia iu manuia a latou aoaoga.
