I le tapena ai e le Loia Sili o ni fautuaga e tuuina atu i le Kapeneta i le mataupu ua iai se finagalo o le Malo e tatau ona suesueina lelei le faalavelave tau taavale ua lua tausaga e lei maua e leoleo ni mau maumaututu e molia ai se tagata poo ni tagata, aemaise o le maua o le taavale na aafia ai le soifua o Tuuau o se atalii 18 tausaga le matua sa aoaoina i le Iunivesite Aoao a Samoa, o lea ua faailoa e le Komesina o le matagaluega o leoleo, falepuipui ma le ola toe fuataina o loo faia nei se suesuega faalotoifalle i leoleo o loo laumanu’ia suafa sa lotolotoi i suesuega ina ua mae’a ona tupu le faalavelave ia Aperila o le tausaga e 2021.

Ua faailoa e le Komesina le susuga Auapaau Logoitino Filipo ina ua fesiligia e le nusipepa o le Samoa Observer i le faaiuga o le vaiaso, o suafa uma o leoleo o loo ta’ua e Samuelu poo Sam i se fesootaiga i luga o upega tafailagi, o loo aafia i le suesuega.

O loo agai tonu i faamatalaga ua faaalia e Samuelu o ia sa iai i le po na tupu ai le faalavelave, ma o lana telefoni foi na pueina ai le ata o numera o le taavale, le telefoni lea na ia ta’ua na ia ave i leoleo ae e lei toe faafoiina atu e leoleo lana telefoni.

O se tasi o tapenaga ua faaiugafonoina e le Kapeneta i lana fono faapitoa na talanoaina ai lenei mataupu, o le silasila lea o le Loia Sili i le faatuina o se vaega suesue e faaaogā ai ni leoleo mai fafo, ae e lē aveesea ai le faaauauina o tiute o le Komesina ma le pulega o le matagaluega o leoleo ia latou galuega masani.

O le Minisita o le matagaluega o leoleo ua faailoa lona lē aafia i tapenaga ua faatino ona o lona sootaga i se tasi o loo tuuaia i le mataupu lenei.