O le pitolaau tauave a le aufaasalalau ma tusitala i le lipotia o mataupu e aafia ai le sauaina o tina ma tamaitai ma fanau teine laiti, e tāua mo le logoina o tagata lautele ma momoli ai se feau ina ia aoaoina ai tagata e taofia ia sauaga.
Peitai e iai nisi taimi e ave ai i ni tala e faasalalau faapea ni ata e tapu’e vaega ua lē malupuipuia ai le saogalemu o tamaitai e aafia i ni sauaga.
O le mafuaaga lea o se fesoasoani a le faalapotopotoga o Malo Aufaatasi le UNESCO ua auala atu ai se aoaoga i le faalapotopotoga o tagata faasalalau ma tusitala i le atunuu, ina ia toe aoao ai alii ma tamaitai o faia lea galuega ina ia toe faamanatu ma faailoa iai, le taiala ua saunoa e faasalalau ai ni mataupu e aafia ai sauaga.
O se aoaoga ua faaalia e le toatele o tusitala o loo auai aemaise le vaega talavou, ua maua ai se isi silafia i le faatinoga o le latou pitolaau i aso uma.
O le UNESCO o se tasi o paaga totino a le faalapotopotoga o tagata faasalalau ma tusitala le JAWS, o loo maua ai i nisi o taimi fesoasoani mo le faaleleia o lea tautua e lē gata i Samoa a o atunuu o le Pasefika o loo i le li’o o malo o loo vaaia e le ofisa o le UNESCO i Apia.
