Ua faatonuina le fai o se iloiloga auiliili faasaga i le alii talavou e 24 tausaga lea na mafua ai le faalavelave matautia na tulai mai i le taeao ananafi.

O Matu Tangi Matua Reid, lea ua faailoa faalauaitele mai i tua o ia lea na tafanaina tagata i le nofoaga o loo fau ai fale i le ogatotonu o le taulaga i Aukilani, ma e faapea o se tasi o loo fealuai ma le tauvae e iloa ai e le vaega o faamasinoga nofoaga o loo fealuai ai a o nofo vaavaia ai.

Fai mai le Palemia Chris Hipkins o le a suesue ai poo fea na ia maua mai ai le laau malosi na ia faaaogaina ae o lea e faasala i lona fale toe e leai sona laisene e na te umia ai se laau malosi.

Saunoa Hipkins o le a suesue ai foi pe iai ni faailoilo na misi a o nofo vaavaaia ai Reid.

Lipoti a leoleo o loo masalomia e ono fesootai le gaioiga a le alii talavou na toe maua mulimuli ane ua maliu, ma lana galuega ae mai nisi o tagata faigaluega sa iai i totonu o le fale i le taimi na tupu ai ananafi e foliga mai e iai lava le tagata na alu atu Reid e sue.

A o ta’uta’u ai le iloiloga ua ta’ua mai i uluai lipoti o lea lava na mataitu e le vaega o faamasinoga le alii o Reid ma o ananafi lea na tupu ai ae o le Aso Lulu le taimi mulimuli na feiloai ai ma lana probation officer.

E toatolu tagata na maliliu i le faalavelave lenei e aofia ai ma le alii talavou na ia faatupuina ma e oo mai i le taeao nei ua faamautinoa mai e leoleo o loo galulue pea e faamaonia poo ai isi tagata e toalua.

Ua faamautinoa mai ai foi e le pulega e ana le fale na tupu ai le faalavelave ananafi, le Precinct Properties o loo faaauau pea ona tapunia nei le fale e tālia ai se isi faatonuga a leoleo.