I le faatupulaia ai o faamai lē pipisi ma le tulaga o faama’i o le mafaufau (mental health), faapea ai ma le pepesi o le Koviti-19 ma aafiaga o suiga o le tau i luga o tamaoaiga o atumotu laiti e aofia ai ma Samoa na faatino ai loa se fonotaga a Minisita a Soifua Maloloina i Barbados.
Na faaalia e le Matagaluega i ana faamatalaga i upega tafailagi, o lenei fonotaga na auai ai le Minisita o le Soifua Maloloina, afioga Valasi Luapitofanua Toogamaga Tafito Selesele ma le Pule Sili o le Matagaluega, Aiono Dr Alec Ekeroma.
O loo mulimulita’i lenei fonotaga i le fonotaga na faatino i le masina o Ianuari o le tausaga nei sa folasia ai nisi o mataupu ma auaunaga ua ausia e atumotu laiti i le vaega o atina’e faaauau e agai lea i le autu o le fonotaga i le masina nei.
Sa talanoaina ai foi nisi o faiga faavae mai le fonotaga a le Faalapotopotoga o le Soifua Maloloina i le lalolagi i atumotu laiti i le 2021 lea sa talosagaina ai sui o atumotu laiti ina ia faamalosia le galulue faatasi e lagolagosua le tali atu i faafitauli o loo aafia ai tagata lautele aemaise ai le lagolagoina o le SAMOA Pathway 2014 ma le Port of Spain Declaration 2007.
