Ua tau fai tuu atoa le malosi ma le silafia o sui e toalua o loo tausinio nei i le palota mo le setete o Niu Sa Uelese i se finauga, debate ua faia e faafoeina e le 7news ma faasalalau tuusao i televise i le atunuu. 

O lē o loo avea nei ma premier o le setete Dominic Perrottet ma le isi sui tauva o Chris Minns ua faaalia o la finagalo i lenei finauga ma faailoa ai vaega o loo ave iai le la faamuamua.

Fai mai Minns o mea nei o palota o se filifiliga ma afai ae filifilia o ia e fai ma premier o le a ia tulai mo tagata uma o loo iai i le setete.

Fai mai a ia o lana vaega faaupufai o le a inivesi tupe i le soifua maloloina ma aoaoga.

O Dominic Perrottet ua ia ta’ua o lana faigamalo o loo sili atu lona tulaga o loo iai i le puleaina o le tala o le tupe a le setete aemaise lava i lenei taimi o le taugata o le soifuaga.

Fai mai a ia o le palota lenei e faatatau i le tamaoaiga ma e tele foi inivesi a lana faigamalo ua faia i tulaga tau aoaoga.

Ua tuu atu foi la i le faitalia a le aumaimoa ma tagata o Niu Sa Uelese e faia le latou faaiuga poo ai le taitai o le a tusilima iai i le faigapalota ua fuafua mo le aso 25 o le masina nei.