Ua faia faataitaiga o nofoaga ua saunia mo le fafagaina o maa o taavale e alu i le eletise.

O se poloketi ua faaigoaina o le Land and Maritime

Decarbonisation Project, poo le CAP-IT, sa molimauina lona faaatoatoaina ina ua faatino faataitaiga o le faaaogāina o nofoaga e fafaga ai taavale e alu i le eletise, ma sa faatino lea tulaga i le nofoaga o le ofisa o Malo Aufaatasi i Tuanaimato lea o loo iai le isi nofoaga ua fausia ai mo le fafagaina o taavale.

Ua faailoa o lenei poloketi ua faailogaina ai se amataga tāua o lo tatou soifuaga a o tatou agai atu ai e faaitiitia ma aveesea le ola faalagolago atu i penisini ma suauu.

A o tatou taumafai ai lea tulaga aemaise i fela’ua’iga i le sami ma le eleele e lē gataua tatou tali atu i suiga ogaoga o le tau ae ua tatou faatāua soifua maloloina ma le ea mamā e tatau ona tatou manavaina.

Ua faatulaga mai e lenei poloketi le taumafaiga tatou te sui mai le suauu agai i oloa e laitiiti ai le kasa o le kaponi.

Ua faaalia o le amataga lenei o lenei suiga lelei ma o loo taumafai ina ia tatou faamuamua i lenei poloketi taavale la’upesese.

O le Poloketi lenei o le CAP-IT o loo faatupe e le malo o Iapani ae faatino e le Malo o Samoa e ala i le galulue faatasi ma Malo Aufaatasi.

O le faamoemoe o loo tulimataia ia faaitiitia le faaaogāina o kasa o le kaponi i itu o femalagaa’iga i le sami ma le laueleele i Samoa, ma ia mafai ona aumaia taavale e alu i le eletise ina ia ausia sini autu o loo faisao atu ai Samoa i le NDCs mo malosiaga ma fela’ua’iga 2030.

O le a faia nofoaga mo le fafagaina o taavale a le malo i Tuanaimato, ae o le a faatulaga ia nofoaga mo le atunuu lautele i nisi o nofoaga i Upolu ma Savaii.