Ua saunoa le Palemia o Niu Sila o le a iai nisi talanoaga e faia ma se tasi o ana minisita ina ua iloa o loo iai ana shares i le malaevaalele i Aukilani e lei manino lelei lona faailoaina.
Sa lipotia e le NZ Herald o le minisita o fela’ua’iga Michael Wood na te lei faailoaina le tulaga lea ina ua avea ma faipule aemaise foi le taimi ua avea ai ma minisita.
I se faamatalaga na ta’ua ai e Wood na ia faatauina shares ia e 1,530 a o talavou ma o lona talitonuga o loo aofia uma i totonu o se trust lea sa ia faalauiloaina i le 2022 ma le tausaga nei foi ma o loo fuafua nei e faatau ese.
Saunoa le Palemia i le lipoti a le One News faatoa malamalama lona ofisa i le mataupu lea i le Aso Faraile na tea nei ma ua ia faailoa o le mataupu a ia e le o se mataupu tau ia ae o le lesitala o mataupu faapea na te faia le faaiuga.
Saunoa Hipkins i le aso ananafi, o le a faatalanoaina le mataupu lea ma le minisita i se taimi o ananafi.
Faailoa se finagalo o le sui sooupu a le National, Paul Goldsmith e faapea e malamalamagofie le mataupu, afai o oe o le minisita o fela’ua’iga e le tatau ona e umia ni shares i le malaevaalele faavaomalo a Aukilani ona o le tulaga conflict of interest pe o le ono aafia ai foi o faaiuga fai ona o loo aofia le minisita i mataupu o loo i lalo o lana vaavaaiga.
