Ua fa’aulu i le faamasinoga ni mau fou e le loia o Unasa Iuni Sapolu ua tula’i nei mo lē sa avea ma malu o le malo ma sa umia le tulaga o se satini le susuga, Laauli Magic Talataina.

O ia mau fou e pei ona fa’ailoa e le tama’ita’i loia ina ua fesiligia, ua mafua ai lana talosaga ua tu’uina atu i le faamasinoga e tolo le lauina o se faai’uga i se faasalaga ae iloilo ia mau ina ia faia ai le faamasinoga tonu. O le susuga i le ali’i loia o Fuiavailili Egon Keil sa finauina le tete’e a lē ua molia ina ua su’esu’eina molimau ma taunu’u ai le faamasinoga i le fa’amaonia o moliaga fitu e aofia ai le fai’aiga fai fa’amalosi, faao’olima matagā ma le faia o s e feusua’iga solitulafono i se tama’ita’i leoleo, ma sa fa’atulaga ai le aso e lauina ai se fa’asalaga.

Peita’i o le suia o le loia a La’auli Magic Talataina ua tu’u atu ai ma le talosaga ua i luma nei o le faamasinoga ina ia tolo le lauina o se faai’uga i se fa’asalaga ona o mau fou poo fresh evidence lea o le a aumai iai se faai’uga i le talosaga a lē ua molia ma lana loia i le vaiaso fou.