E lē o misi lava se vaiaso ma mataupu tau soligatulafono o le gaoi ma le talepe fale e oo atu i luma o le faamasinoga maualuga.
O le vaiaso lenei e silia ma le 10 mataupu tau gaoi ma talepe fale na valaau i luma o le faamasinoga maualuga i le amataga o le vaiaso nei.
O ia mataupu e aofia ai se tamaitai o Annie Angela Tuitauvaga na ia ioeina moliaga o le gaoi a o avea ma tagata faigaluega a le kamupani o le Samoa Sisters.
O lea mataupu na aveesea ai e lea tamaitai ni mitiafu mai le kamupani sa galue ai.
O le isi mataupu o se alii sa galue i le KokoBanana na ia aveesea ai ni fagumalosi e oo atu lona tauaofai i le silia ma le $700 tala.
O le isi mataupu o se tamaitai sa galue i le Supamaketi a Frankies na ia aveesea mai ai ni oloa e oo atu lona tau i le $1,200 tala.
O le isi alii o Sefo Logopati sa ia aveesea mai ni pusa pisupo ma ni sikaleti.
O le vaiaso nei na agiga ai i luga o upega tafailagi se ata o se alii na maua i meapueata a se tasi o faleoloa a se faipisinisi Saina lona aveesea o se oloa mai le fata ae tuu i totonu o lona ofuvae se’i tulou.
O le lua vaiaso ua tuanai atu o se ata a se tasi o tamā na agai i le maota gasegase i Motootua, ae mae’a ane lana siaki ua faaleaga lana taavale.
E lē gata i lea ae o loo iai foi nisi o mataupu o tamaitai sa galulue i faletupe ma e fai si tele o seleni na aveesea mai.
O mafuaaga a nisi na fesiligia o loo faapea mai, ua maualuga le tau o le soifuaga, ma e lē na o Samoa o loo iai lea tulaga.
Mo le silafia o le faasalaga a le faamasinoga mo le tagata e faamaonia le soligatulafono o le gaoi ma le talepe fale e falepuipui mo le umi e lē silia ma le 10 tausaga.
