O le polokalame fesoasoani a Saina o loo unaia ai le atina’e o faatoaga ma lafumanu, ua molimauina talu ona faaopoopo iai ma taumafaiga o lafumoa e fasi ma faaaoga i taumafa, ua faamauina ua oo atu i le 10 afe tamai moa ua tufatufa i fai lafu moa i le atunuu i le tausaga, ma ua siitia ai i le selau le isi au fai lafu moa ua manaomia ni tamaimoa mo a latou taumafaiga.
O se pepa o faamaumauga mai lea polokalame o loo i le vaaiga a le matagaluega o faatoaga ma faiga faifaiva ua faailoa ai, e talu mai le tausaga na tea nei 2022 ua molimauina le agai i se tulaga lelei o lea taumafaiga ua galulue faatasi ai le Malo ma le polokalame lea a Saina ua ta’ua o le Samoa China Agriculture Technical Aid Assistance.
O le polokalame foi lea ua na fausia le fale e gaosi ai meaai e tausi ai moa o le atina’e, auā e manaomia tele lea faiga ina ia lelei ona tausi ma maua ai le aano lelei o moa mo le taumafa.
O le kamupani a Frankies o se tasi lea o auaunaga tau pisinisi ua na fausia se fale e fasi ai le moa ma tapena lelei ai mo le faatauina i le atunuu auā taumafa.
O se faiga ua faailoa mai a lelei ona faafailele ma siitia lona tulaga, o le a mautinoa le faaitiitia ai o le faalagolago pea i aano o moa o loo la’u mai fafo.
O le tau o le aano o moa o loo aumai mai fafo i le taimi nei ua 6 tala 61 sene i le kilo, faatusa i le tau na amata ona aumai ai sa 3 tala 10 sene i le kilo.
