O le amataga o le vaiaso nei na tulai mai ai foi se isi faalavelave tau taavale i Mulinuu ina ua fetoai se taavale o le ituaiga o le 15 seater Van ma se poumōlī eletise.
O le tulai mai o lenei faalavelave tau taavale na tali atu ai le Matagaluega o Leoleo ona o le poumoli ola lea na aafia i lea faalavelave ma o popolega ina nei aafia seisi i uaea ola o le poumoli.
Taua e sui o le fale taavale laititi (taxi stand) o loo i autafa tonu o le nofoaga na tulai mai ai le faalavelave o le itula e 4 i le taeao na lavea ai lea taavale. Na auai foi ma sui o le Pulega o Malosiaga tau eletise ina ia toe suia lea poumolī aua lava le saogalemu o tagata feoai.
O se tasi nei o faalavelave tau taavale mai le tele o nisi faalavelave na tulai mai i lenei tausaga aemaise lava lenei masina o Aukuso. O le vaiaso na tea nei lea na tulai mai ai foi se faalavelave tau taavale i Taufusi ma uma ai le ola o se alii A’oa’o .
O loo faagasolo suesuega a leoleo poo le a le mafuaaga o nei faalavelave tau taavale.
