Ua faatupulaia le tele o fualaau faasāina o loo aumai faananā i totonu o le atunuu ma o le tele o lea o loo aumai faananā mai i totonu o container lauoloa.

I le tolu tausaga talu ai ua faamauina e leoleo le tele o fualaau faasāina e aumai i totonu o le atunuu, ma o le tele o lea na maua atu e le vaega o tiute.

I le tausaga e 2020 na faamauina e 305 kilokalama le mamafa o methamphetamine poo le ‘aisa, sau a’i i le 2021 e toeititi faatoluina ma maua ai le 844 kilokalama, o le tausaga na sosoo ai 2022 e silia ma le 1,800 kilokalama.

Ae mo le tausaga e 2023 lea faatoa ‘afa, ae ua silia ma le 1,200 kilokalama ua faamauina i le va o Ianuari ma Aperila.

A o faatupulaia ai pea la le aumai i totonu o le atunuu o fualaau faasāina nei, o lea foi o loo agai suesuega i le auala ua tele ina toe faaaoga ai tagata o loo faigaluega i tuaoi e kegi poo i latou o loo tele ina aumaia faasolitulafono le ‘aisa e faaauala mai ai.

A o pisi ai leoleo faapea le vaega o tiute e faapea saienitisi o loo tele ina ave iai pauta poo vailaau mo suesuega, ma i lipoti a le 1News ua toe ta’ua ai pe ā ma le faaluaina le tele o sample ua faaoo atu mo iloiloga i tototnu o le tolu masina muamua o lenei tausaga pe a faatusa i le 2022.