O le afioaga o Salailua e iai lo latou faatanoa vai e maua ai e aiga le suavai i aso uma, peitai e iai faafitauli na feagai ma le nuu i le tau le maua o le suavai i nisi taimi, na mafua ai ona saili fesoasoani i le polokalame laveai a le Malo o Iapani ma faatupe ai se tanevai tele na faatau mai Ausetalia.
O le tau o lea fesoasoani e silia i le 437 afe tala Samoa.
Ua faailoa e le sui o le Malo o Iapani i le tauaaoina o lea fesoasoani o le a maua e aiga e 200 o le nuu poo le silia i le 2.300 tagata o Salailua le suavai lelei e le toe faaletonu ona ua iai le tanevai tele o le a faasoa atu ai i aiga.
E le gata i tagata o le nuu ae faapea foi le kolisi maualuga o loo iai ma le aoga tulagalua.
O le tausaga na tea nei na savalia ai e le komiti a le nuu le ofisa o Iapani i Apia ma momoli iai le talosaga lea e lei umi ae maua le tali o le a faatupe e lea malo le tanevai.
Sa molimauina le tauaao atu o lea foai a Iapani e le sui o lea Malo i lo tatou atunuu ma le faipule tamaitai o Palauli Numera 1 le afioga i le Minisita o Tupe, afioga Mulipola Anarosa Ale Molioo.
