I le oo mai o faamatalaga i le lē faamaoni o nisi o malu o le malo i le faatinoga o le galuega o le māta’itūina o tagata e tagofia le ‘ava malosi e ala i le masini feula paluni poo le breathalyser.
O lea ua māua le tuuina ai o se faamatalaga (memo) a le auaunaga i ona tagata faigaluega, i le lē matagofie o lenei matāupu, ua matagā ai le ofisa, ma ua faaleagaina ai foi le vā o le auaunaga ma tagata lautele, ua leai foi se talitonuga o tagata i leoleo talu ai le lē faamaoni o i latou i le faatinoga o le latou pitolaau.
Ma i le alia’e ai o lenei faafitauli, o lea ua faia le faai’uga a le matāgaluega, e faamalosia leoleo uma o i latou o constables e auai ma faatino a’oa’oga i le faatautaiga sa’o o le galuega i le māta’itūina o le tagofia ai e tagata o le ‘ava malosi ma isi e ala i le malamalama lelei i ta’iala ma aiaiga i le faaaogāina sa’o o le masini feula paluni, le breathalyser.
Faamanino e le Sui Komesina Lagolago Jill Rogers, o le faatautaiga o le galuega faaleoleo i luga o le auala lea o loo tele ai aafiaga ma faafitauli i le lē tonu ma sa’o o fua faatatau o loo aumai o le fuaina o le malosi o le ‘ava malosi na taumafaina e se tagata ave taavale.
Puna o Faamatalaga: https://www.rnz.co.nz/news/national/577999/police-officers-ordered-to-complete-mandatory-online-alcohol-breath-testing-training
