Ua tali mai le Ofisa Sili o Pulega o le Matagaluega o le Soifua Maloloina i fesili na tuuina atu iai e faatatau i ni tusi lapatai (warning letters) e faapea ua tuuina atu lea i nisi o le aufaigaluega e tusa o le mataupu i ovataimi.
Na fesiligia foi Aiono pe faamaonia ua tuuina atu le mataupu i le PSC mo le suesueina.
Sa tali mai le Ofisa Sili e faapea o matagaluega uma a le malo ma faalapotopotoga a le malo o loo manaomia e faiga faavae ma tulafono le tatau ona suesue uma totogi ma taimi faamauina sa galulue ai.
Peitai na ta’ua e Aiono e lei faia lava lea tulaga talu mai le taimi na tuufaatasi ai le Matagaluega o le Soifua Maloloina ma le Auaunaga Lautele tau Soifua Maloloina.
Ua faailoa foi o le taimi nei ua faatonuina le suesueina o ovataimi o loo faatalosagaina aemaise o taimi faamauina mo le agai i luma.
Na ta’ua e Aiono e faigata lava pe a agai e faia suiga, peitai e iai lona lagona o le a mafai ona faamasani le aufaigaluega i suiga nei, ma o le a tuuina atu foi faamatalaga e uiga i ia mataupu.
O tusi lapatai foi o le a faatulai mai lava o se faaiuga o le faagasologa ma o le a suia foi le fuainumera a o faagasolo ai.
O le tulaga i le tuuina atu i le PSC faatoa tupu pe afai e ogatusa ma faiga faavae ae o le taimi nei e leai se mataupu ua tuuina atu i le PSC.
