O le toaiva o taulelea o le nuu o Faleula o loo tuua’ia i ni moliaga e fesoota’i i le aafia o le fale o se aiga i se afi poo le malaia, o le toatasi o i latou e lei tula’i i le faamasinoga ona ua alu ese ma Samoa ona o galuega faavaitaimi i Niu Sila, ua faatonuina nei e le faamasinoga se tusi saisai e sailia ai o ia.
O Tetele Pii Lepale poo PJ, na lē talia e le faamasinoga le sailia i se tusi saisai ina ua talosaga muamua loia a leoleo, ona o le taimi lea o loo faailoa i faamaumauga na tuuina atu i le faamasinoga e lei faia e leoleo se tusi e samania ai Tetele e oo atu i le faamasinoga.
Peitai ina ua toe valaau moliaga o ia alii e toaiva i le amataga o le vaiaso nei, na faailoa ai e le afioga i le faamasino o Fepuleai Ameperosa Roma, o lea ua maua atu faamaumauga mai leoleo ua uma ona tuuina atu le tusi samania mo le taulealea ua alu ese ma le atunuu.
E toaono taulelea mai se aiga e tasi o loo molia lava i lenei mataupu tau faamasinoga ua faamautū le latou loia, ma ua tuuina atu e le latou loia o Lusi Sio a latou tali tetee.
O le isi toalua o taulelea o loo tuu avanoa iai le faamasinoga e saili ni loia e tula’i mo i la’ua ma e tatau ona oo atu i le isi valaauga ua maua ni loia.
