O le faatalatalanoaga lenei sa taimua ai le Vaega o loo gafa ma le siakiina o le vaai i totonu o le Matagaluega o Soifua Maloloina ma ana paaga o loo agai ina ia faaitiitia ai le aafiaga o le vaai ma oo ai ina po le silasila.

O le auga ma le faamoemoe ina ia mafai ona foia vave lenei faafitauli i le mamalu o le atunuu o loo aafia le vaai.

I pepa o faamatalaga mai le Ofisa o le Sooupu a le Malo, na faia ai se pepa a le fomai mata Lucilla Ah Ching Sefo o ia lea o loo gafa ma lenei tiute i tulaga o avanoa o vaega foi o loo fai ma faafitauli i lenei vaega o le soifua maloloina.

Na ia faailoa foi tulaga o aoaoga sa feagai ma nisi o loo galulue i lenei vaega i tausaga ua mavae lea o loo fesoasoani tele i auaunaga mo le atunuu.

Na saunoa le Minisita o le Soifua Maloloina, Valasi Tafito Selesele o tulaga o loo ausia e auaunaga nei ona o loo vaaia pea le agai i luma o le atina’e i nofoaga o loo faatino ai nei galuega faatasi ai ma le tomai faapitoa a tagata faigaluega.

“O le manuia o auaunaga faatino e tāua ai le toe saili ma toe faaleleia atili pea o le tautua ma o le manulauti ia siitia le tulaga o auaunaga i le siaki o le vaai mo le mamalu o le atunuu.”

O le taumafaiga lava a le Soifua Maloloina ina ia mafai ona aveesea se aafiaga tele lea pe a faaletonu le vaai e le gata i le soifua manuia a le lautele ae o le tulaga i le atina’e o le tamaoaiga o le atunuu pe a faatupulaia le tele o i latou e aafia le vaai e ala i le lē mafai ona toe faaaogāina le soifua i galuega.

O le naunautaiga o le Matagaluega ina ia mafai ona togafitia vave pe a oo ina aafia le vaai auā le puipuiga o le soifua manuia o soo se tagata.