Ua amata faatino su’esu’ega a le Auaunaga o Leoleo i le aafia ai o se fale’aiga (cafè) i le faaitu o Hibiscus Coast i ni afi na tula’i mai i le Aso Toona’i o le vaiaso ua tuana’i atu.
O lenei galuega faatino ua faaigoaina o le Operation Governor, ma ua aga’i le auaunaga e sa’ili’ili tulaga uma o le faalavelave, ona e iai le talitonuga na susunu e se tasi poo nisi nei pisinisi (arson).
Faamanino e le Ta’ita’i Leoleo Asiasi, Inspector John Thornley o le auaunaga i Waitematā, ua tele lava aafiaga i nei faaitu talu ai nei gaioiga faasolitulafono.
Pau le tala fiafia, e le’i iai se tasi ua aafia i lenei faalavelave mata’utia, ae ua faaalia le faanoanoa tele i le tula’i mai o nei gaioiga.
Ta’ua i faamatalaga mai leoleo, o le tasi lenei o mū ua faaopoopo atu i le tele o nisi o faalavelave o loo masalomia le taumafai o se tasi poo nisi e susunu se fale (attempted arson).
Ma ua lapata’ia e leoleo ē o loo faatinoina ia soligatulafono, o le a lē ‘alo lava le latou auaunaga mai le faatino ai o le latou pitolaau ina ia molia ma taofia uma i latou, ina ia mautinoa le malupuipuia o tagatānuu o ia faaitu, aemaise ia malupuipuia meatotino ma pisinisi a tagata.
Faaalia foi e leoleo o loo latou su’esu’eina nei faalavelave pe iai ni fesoota’iga.
Ua faamauina le iai pea o leoleo i Ōrewa mo a latou sa’ili’iliga.
Ua fautuaina foi le mamalu lautele o lea faaitu ina ia faafesoota’i atu le ofisa pe a iai ni gaioiga solitulafono e masalomia o loo faatino e nisi.
Puna o Faamatalaga: https://www.facebook.com/share/p/19vwtqGsCf/
