Ua faia nei se suesuega a le ofisa o le Komesina o mataupu faalilolilo Privacy Commissioner’s office i le kamupani a le Latitude Financial ma le mataupu na aafia ai le data breach na aafia ai ia Mati ma faailoa ai le tusa ma le 1,037 afe o faamaumauga o tagata Niu Sila e aofia ai faamaumauga o laisene avetaavale ma tusifolau.

Na lipotia i le One News i le asō pe ā ma le 90 afe isi paaga a le kamupani i Niu Sila nei ua faailoa atu ai foi ma o latou faamaumauga tau faletupe ma a latou tupe maua ma tupe faaalu.

Ua faailoa ai e le ofisa o le komesina i le One News ua faia nei se suesuega fai faatasi a le latou ofisa ma isi ana paaga mai Ausetalia o loo galulue ai i le mataupu lea ma o le a taulai ai le vaai pe faapefea ona tulai mai lenei faaletonu ae pe aisea foi na umi ai le taimi o taofia e le kamupani faamaumauga ia a customers.

O loo unaia i latou ua aafia i lenei mataupu ina ia fesootai i le ofisa o le komesina ia faatulaga ane ai se tagata suesue e feagai ma a latou mataupu pe a mae’a le suesuega o loo faagasolo i le taimi nei.