Aso Gafua, 12 Oketopa 2026.

O le toe tatala o malaga a va’alele o le Samoa Airways i le va o motu o Upolu ma Savai’i, ua matala ai ma le faitoto’a o le auaunaga tāua a le kamupani va’alele a le atunu’u, o le aumai e ona va’alele o gasegase tīgāina mai Savai’i mo le maota gasegase i Motootua.

O le Aso Faraile ua mavae i le toe amatalia o lea tautua na aumai ai mai Savaii se gasegase mai le afio’aga o Fa’ala i Palauli mo le maota gasegase o Tupua Tamasese Meaole i Motootua mo nisi o togafitiga ma su’esu’ega faafoma’i.

O lea tautua a le Samoa Airways e togipau ai e le Malo e ala i le Matagaluega o le Soifua Mālōlōina le Va’alele e f’a’anatinati ai ona aumai mai Salafai se gasegase ua tūga ona aafiaga mo le falema’i autū i Apia.

I se pepa o fa’amatalaga fa’alauaitele mai le malo o loo fa’ailoa ai o se tasi lea o fa’anaunauta’iga o le malo e toe tatala malaga a va’alele i le va o motu o le atunu’u ina ia mafai ona ofoina ai le fesoasoani silisili mo gasegase tīgāina e fia aumai mai le motu tele i Salafai mo togafitiga i Apia auā o se auala sili lea ona vave, faatusa i e vaa o le sami e silia i le itula o folau mai i le uafu i Mulifanua.

O le va’alele o le Samoa Airways e na’o le 15 minute taunu’u i le malae va’alele i Fagalii ona auina lea o le gasegase i Motootua.

Ua fa’ailoa e le kamupani va’alele e lima afe tālā le totogi o le auaunaga mo se gasegase e aumai mai Savai’i i Upolu i malaga i le va o Maota ma Fagali’i, ae fa afe tālā i malaga i le va o Maota ma le malae va’alele faavaomalo i Faleolo.