O le tauvaga masani lenei a le asosi Triathlon Samoa i tausaga taitasi e faatinoina ai tauvaga e le gata i le faalauiloaina o lenei ituaiga faagatama ae fesoasoani foi i tapenaga a le ‘au mo taaloga a le Pasefika i le masina o Novema o le tausaga nei.

E tolu vaega e aofia ai le vaega o fanau laiti, Super Sprint ma le vaega o le Sprint Triathlon.

Na ta’ua e le sui o le Asosi, Lani Young o lenei faamoemoe o loo faailoa mai ai le tulaga o le ‘au a le Triathlon Samoa i lona atina’e mai.

“E lagona le fiafia ia i latou o loo taumafaia lenei ‘au, o loo tauva lava le tagata ia ina ia sili atu lana taumafaiga ia latou taimi na iai.

“O se vaega tāua foi lea e ta’u mai ai le tulaga maoa’e o a latou toleniga mai le fia masina ua mavae ma e faamalo atu ai i faiaoga o le faaiuga o lenei tauvaga o loo aumai ai le sologa lelei pea o le tulaga i polokalame ma toleniga o loo faatino e faiaoga i la latou pitolaau.

“E fiafia foi e tilotilo atu i nai fanau laiti i la latou foi sao i lenei faamoemoe e ui ina laiti ae o loo taumafai lava o se amataga fou lea ia i latou.”

E 14 sui o le ‘au a Samoa na tauva ai i lenei tauvaga na tulaga ese ai le siitia o le taumafaiga a se tasi o sui iloga o lenei taaloga Darren Young ina ua manumalo i le vaega mulimuli o le tauvaga e faatusatusa i lana taumafaiga i taaloga a le Pasefika mai le fā tausaga talu ai.  

O lenei faamoemoe sa auai ai nisi o pisinisi aemaise le mamalu o le atunuu e molimauina.